ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Գյումրիի նախկին «Շիրակ» հյուրանոցի և նրան հարակից տարածքում նախատեսվում է կառուցել նոր հյուրանոցային համալիր՝ իր սպասարկման կենտրոններով: Ներդրումային ծրագիրը գնահատվում է մեկ մլրդ դրամ: «Արմենպրես»-ի փոխանցմամբ, ՀՀ կառավարությունն իր առաջիկա նիստում քննարկելու է Գյումրու «Շիրակ» հյուրանոցի վթարային շենքի ապամոնտաժումից հետո մնացած շինությունը և դրա սպասարկման համար նախատեսված հողամասը սեփականության իրավունքով «Բասենի Գովք» ՍՊԸ-ին տրամադրելու հարցը` տարածքում հյուրանոցային համալիրի, առևտրային կենտրոնի և սննդի սպասարկման վայրի կառուցման նպատակով: 

Նախագծի հիմնավորման համաձայն՝ ՀՀ վարչապետ Կարեն Կարապետյանի մոտ կայացած մարզային ներդրումային ծրագրերի քննարկման արդյունքներով հավանության է արժանացել Գյումրի քաղաքում հյուրանոցային համալիրի, առևտրային կենտրոնի և սննդի սպասարկման  վայրի կառուցման ներդրումային ծրագիրը: Ծրագրով նախատեսվում է 1988 թվականի երկրաշարժից մինչ օրս փլատակների վերածված նախկին «Շիրակ» հյուրանոցի և նրան հարող տարածքում կառուցել նոր հյուրանոցային համալիր և սպասարկման կենտրոններ: Ծրագրով նախատեսվում է շուրջ 1 մլրդ դրամի ներդրում և 100-150 աշխատատեղերի ստեղծում:

Ընկերությունը բացի ներդրումներից՝ պարտավորվել է պահպանել և վերականգնել կիսաքանդ շինությունում առկա թեմատիկ քանդակները: Պայմանագրով նախատեսված աշխատանքները երեք տարվա ընթացքում չավարտելու դեպքում՝ հողամասը և դրա վրա կատարված ներդրումներ ու անբաժանելի շինությունները վերադարձվելու են Հայաստանի Հանրապետությանը՝ ի դեմս ՀՀ կառավարությանն առընթեր պետական գույքի կառավարման վարչության: