Ժամանակը Երևանում՝ 11:07:36,   15 Նոյեմբեր

Երևանում Անրի Վերնոյի անունով փողոց կոչվեց


ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Երևանում փողոց անվանակոչվեց Ֆրանսիայի լավագույն կինեմատոգրաֆիստներից մեկի` ազգությամբ հայ, Հայոց ցեղասպանությանը նվիրված «Մայրիկ» ֆիլմի ռեժիսոր Անրի Վերնոյի  անունով: «2015 թվական, ապրիլ Անրի Վերնոյի փողոց, Երևան, Հայաստան: Սա անհավատալի է: Ելույթին պատրաստվելիս բազմաթիվ բառեր անցան մտքովս՟ հիշողություն, հպարտություն, հարգանք, կամք և հավերժություն: Այս բառերը, որ հատուկ արձագանք են ստանում այս տարի, ցանկացա ամփոփել մեկ բառով` շնորհակալություն: ՀԲԸՄ-ի հետ հանդիպմանը մենք նշեցինք, որ հայերի միասնականությունը  մեր այբուբենն է, մեր ուժը մեր միասնությունն է: Ես նույնպես կարծում եմ, որ մեր ուժը մեր միությունն է, և այսօրվա իրադարձությունը այդ միության լավ ամփոփումն է»,- «Արմենպրես»-ի փոխանցմամբ` փողոցի անվանակոչման հանդիսավոր արարողությանը նշեց արվեստագետի որդին` Պատրիկ Մալաքյանը: Նրա հետ բեմում կանգնած էին քույրը և Վերնոյի երկու թոռները:

Պատրիկ Մալաքյանը հավելեց, որ մի քանի անգամ փորձ է կատարվել Անրի Վենոյի անունով փողոց անվանակոչել Երևանում, և այսօր վերջապես Երևանի քաղաքապետի շնորհիվ դա իրականություն դարձավ: Նրա խոսքով՟ փողոցի անվակոչումը և հուշաքարի բացումն ապրիլին իրականացնելու որոշումը հատուկ խորհուրդ ունի, և դա պատահական չէ:

Երևանի գլխավոր ճարտարապետ Տիգրան Բարսեղյանն իր խոսքում ընդգծեց, որ Անրի Վերնոյը հայ ժողովրդի հետեղեռնյա վերածննդի մեջ մեծ ներդրում ունեցած անհատներից է, ինչով էլ արդարացիորեն  հիմնավորվում է այս փողոցի անվանակոչումը: «Այսօր Երևանի քաղաքապետի առաջարկությամբ և ավագանու որոշմամբ` առիթ ունենք մասնակցելու Երևանի Կենտրոն վարչական շրջանում Ամիրյան փողոցը Գլխավոր պողոտային միացնող այս գողտրիկ փողոցի բացման և անվակակոչման արարողությանը: Մեր երկրում շատ գործիչներ կան, ովքեր իրենց գործունեությամբ մեծ ավանդ են ունեցել սփյուռքի և Հայաստանի ժողովրդի հետեղեռնյա վերածննդի գործում: Անրի Վերնոյն այդ մարդկանց լավագույն ներկայացուցիչներից մեկն է մեր ժամանակաշրջանում, ինչով էլ արդարացիորեն  հիմնավորվում է այս փողոցի անվանակոչումը նրա անունով` խորհրդաշնելով իր ժամանակակիցների ունեցած համանման ավանդի փաստը»,- ասաց նա:

Վերնոյի անունը կրող փողոցի վրա բացվեց նաև ֆրանսահայ կինոգործչի հուշաքարը: Արարողությանը ներկա էին ՀՀ սփյուռքի նախաարար Հրանուշ Հակոբյանը, ՀՀ մշակույթի նախարար Հասմիկ Պողոսյանը, Երևանի քաղաքապետ Տարոն Մարգարյանը, ֆրանսիական և հայկական կինոյի մի շարք հայտնի գործիչներ, Անրի Վերնոյի բազմաթիվ ընկերներ ու երկրպագուներ:

Այնուհետև Երևանի թատրոնի և կինոյի պետական ինստիտուտի երկրորդ հարկում տեղի ունեցավ Անրի Վերնոյի անվան կինոսրահի հանդիավոր բացումը, անցկացվեց հայության մեջ մեծ վայելում ունեցող «Մայրիկ» ֆիլմի ռեժիսորին  նվիրված հուշ-երեկո: Հանդիսատեսին ներկայացվեցին արվեստագետի կենսագրության դրվագները:

Ապրիլի 2-ին Երևանի կամերային պետական թատրոնում մեկնարկեց «Անրի Վերնոյի օրերը Երևանում» խորագրով միջոցառումներրի շարքը, որը կտևի մինչև ապրիլի 5-ը: Աշխարհահռչակ ռեժիսորի ավանդը և արվեստը գնահատողները մի քանի օր շարունակ հնարավորություն կունենան մասնակցելու անվանի մտավորականին նվիրված միջոցառումներին: Ապրիլի 5-ին էլ «Համազգային» թատրոնում  կցուցադրվեն Վերնոյի ֆիլմերը:

Կինոռեժիսոր Անրի Վերնոյը (Աշոտ Մալաքյան) ծնվել է Թուրքիայի Ռոդոսթո քաղաքում 1920թ.-ին: 1924թ. ծնողների հետ տեղափոխվել է Ֆրանսիայի Մարսել քաղաք` միանալով Մեծ եղեռնից մազապուրծ հազարավոր հայ ընտանիքներին: Էքս ան Պրովանսի ֆրանսիական լիցեյն ավարտելուց հետո, անցել է լրագրողական գործունեության: 1945թ.-ին Անրի Վեռնոյ կեղծանունով Հայ Դատի վերաբերյալ հոդվածաշար է հրապարակել «Մարսելյեզ» թերթում: 1947թ.-ից անցել է կինոյի ոլորտ: Նկարահանել է մի շարք կարճամետրաժ ֆիլմեր հռչակավոր կատակերգու Ֆեռնանդելի մասնակցությամբ: 1951թ. ասպարեզ է հանել իր առաջին` «Մեռածների սեղան» լիամետրաժ խաղարկային ֆիլմը, որի շնորհիվ դասվել է Ֆրանսիայի լավագույն կինեմատոգրաֆիստների շարքը: Հոլիվուդը պայմանագրեր է կնքել նրա հետ: Ժան Գաբենի, Ալեն Դելոնի, Ժան-Պոլ Բելմոնդոյի, Օմար Շարիֆի և այլոց համագործակցությամբ ավելի քան 40 կինոնկար է նկարահանել: 1980թ.-ին այցելել է Հայաստան: 1996թ.-ին արժանացել է «Սեզար» մրցանակի: Կյանքի վերջին տարիներին նկարահանել է «Մայրիկ» և «Պարադի փողոց, թիվ 588» լիամետրաժ ֆիլմերը, որոնցում արտացոլել է իր մանկության և պատանեկության տարիները, հայերի չարչարանքները: Մահացել է Ֆրանսիայի Բանյոլե քաղաքում 2002թ.-ին:





Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ