ԳԱՎԱՌ, 31 ՕԳՈՍՏՈՍԻ, ԱՐՄԵՆՊՐԵՍ։ 2022 թվականի  սեպտեմբերի 1-ից՝ նոր ուսումնական տարվանից սկսած Սեւան համայնքում կրկին կգործարկվի ուսանողական ավտոբուս` Սեւան-Երեւան-Սեւան ուղղությամբ:

Ինչպես «Արմենպրես»-ին տեղեկացրին Սեւանի համայնքապետարանի աշխատակազմից, այս օրերին Սևանի համայնքապետարանում իրականացվում է հերթագրում ուսանողական ավտոբուսից օգտվել ցանկացող ուսանողների համար:

«Ուսանողական ավտոբուսի առաջին մեկնումը նախատեսված է սեպտեմբերի 1-ին։ Առավելություն է տրվելու այն ուսանողներին, որոնք միակողմանի կամ երկկողմանի ծնողազուրկ են, Արցախյան 2-րդ պատերազմի մասնակիցներ կամ մասնակիցների երեխաներ են, Արցախից տեղահանվածներ են, բազմազավակ, երկու եւ ավելի ուսանող ունեցող ընտանիքների անդամներ են: Սեւանից Երեւան եւ հակառակ ուղղությամբ իրականացվող երթուղու ընդհանուր արժեքը 1400 դրամ է, որի դիմաց ուսանողները վճարելու են ընդամենը 600 դրամ, որն ուղղվելու է ավտոբուսի պահպանման ծախսերին։ Գործարկվող ուսանողական ավտոբուսը 60-տեղանոց է։ Մենք ուշադիր հետեւելու ենք ուսանողների տեղափոխության շարժին, եւ եթե տեսնենք, որ երկրորդ ուսանողական ավտոբուսի կարիքը զգացվելու է, ապա համայնքապետարանը կգործարկի նաեւ հերթական ավտոբուսը»,-նշեցին Սեւանի համայքնապետարանի աշխատակազմում։

Խոսրով Խլղաթյան