Գվատեմալայի Հանրապետության Կոնգրեսի առաջին փոխնախագահն այցելել է Հայոց ցեղասպանության հուշահամալիր
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: Գվատեմալայի Հանրապետության Կոնգրեսի առաջին փոխնախագահ Ֆելիպե Ալեխոս Լորենզանան և Կոնգրեսի պատգամավոր, նախագահության քարտուղար Խուան Ռամոն Լաուն դեկտեմբերի 6-ին ՀՀ ԱԺ նախագահի տեղակալ Լենա Նազարյանի ուղեկցությամբ այցելել են Հայոց ցեղասպանության հուշահամալիր:
«Արմենպրես»-ի հաղորդմամբ՝ այս մասին տեղեկացնում են Հայոց ցեղասպանության թանգարան-ինստիտուտից:
ՀՑԹԻ փոխտնօրեն Լուսինե Աբրահամյանը հյուրերին ներկայացրել է Հայոց ցեղասպանության հուշահամալիրի կառուցման պատմությունն ու նշանակությունը:
Կոնգրեսականները ծաղիկներ են դրել Հայոց ցեղասպանության զոհերի հիշատակը հավերժացնող անմար կրակի մոտ, լռությամբ հարգել են Սուրբ նահատակների հիշատակը:
Գվատեմալայից ժամանած պատվիրակությունը եղել է նաև Հայոց ցեղասպանության թանգարանում, ՀՑԹԻ էքսկուրսավար Անժելա Թևեքելյանը հյուրերին ծանոթացրել է 20-րդ դարի առաջին ցեղասպանությունը փաստող վավերագրերին, թանգարանային ցուցադրությանը:
Պատվիրակության ղեկավարները գրառում են կատարել Պատվավոր հյուրերի հուշամատյանում: