Սեւանա լիճ բաց թողնվեց Սեւանի իշխանի մանրաձկան հերթական խմբաքանակը
ԳԱՎԱՌ, 29 ՆՈՅԵՄԲԵՐԻ, ԱՐՄԵՆՊՐԵՍ: «Սեւանի իշխանի պաշարների վերականգնման եւ ձկնաբուծության զարգացման» հիմնադրամը, շարունակելով դեռեւս 2015 թվականին մեկնարկած Սեւանի իշխանի բնական պաշարների վերականգնման նպատակով մանրաձկան արտադրության եւ լիճ բաց թողնելու աշխատանքները, 2019 թվականի նոյեմբերի 26-ին իրականացրել է մանրաձկան երկրորդ խմբաքանակի բացթողումը լիճ:
Ինչպես «Արմենպրես»-ին տեղեկացրին Գեղարքունիքի մարզպետարանի գյուղատնտեսության եւ բնապահպանության վարչությունից, մանրաձկների բացթողնման աշխատանքները կատարվել են Հիմնադրամի եւ ՀՀ բնապահպանության նախարարի համապատասխան հրամանով ստեղծված մասնագիտացված աշխատանքային խմբի անմիջական մասնակցությամբ:
Սեւանա լիճ է բաց թողնվել Սեւանի իշխանի Ամառային տեսակի շուրջ 11 հազար հատ մանրաձուկ՝ 21,5 գրամ միջին քաշով եւ Գեղարքունի տեսակի 10 հազար հատ մանրաձուկ՝ 45.2 գրամ միջին քաշով: Մանրաձկան ձեռքբերումն իրականացվել է Հիմնադրամի կողմից ստեղծված ‹‹Սեւանի իշխան›› ՓԲԸ-ին պատկանող մանրաձկան գործարանից, իսկ ձկների բացթողումն իրականացվել է Կարճաղբյուր եւ Մասրիկ գետերում: Ընդհանուր առմամբ՝ 2019 թվականին «Սեւանի իշխանի պաշարների վերականգնման եւ ձկնաբուծության զարգացման» հիմնադրամն իրականացրել է 72 հազար հատ Սեւանի իշխանի մանրաձկան բացթողում, որից 22 հազարը եղել է Ամառային, իսկ 50 հազարը՝ Գեղարքունի տեսակի: Ըստ Գեղարքունիքի մարզպետարանի գյուղատնտեսության եւ բնապահպանության վարչության պետ Համբարձում Համբարձումյանի՝ Սեւանա լիճ բաց թողնված մանրաձկան խմբաքանակները եղել են բարձրորակ ու կենսունակ:
Խոսրով Խլղաթյան