Մարվեցին երկու նոր նամականիշներ
ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ: Շրջանառության մեջ դրվեց երկու նամականիշ` նվիրված «Հայաստանի ֆլորա և ֆաունա» թեմային:
Ինչպես տեղեկացնում է «Արմենպրես»-ը, նոյեմբերի 12-ին նամականիշները մարեցին ՀՀ բարձր տեխնոլոգիական արդյունաբերության փոխնախարար Արմեն Աբրոյանը, ՀՀ շրջակա միջավայրի փոխնախարար Վարդան Մելիքյանը, «ՀայՓոստ» ՓԲԸ_ի գլխավոր գործադիր տնօրեն Հայկ Ավագյանը և Հայաստանի ֆիլատելիստների միության նախագահ Հովիկ Մուսայելյանը:
230 ՀՀ դրամ անվանական արժեքով նամականիշի վրա պատկերված է ճյուղի վրա նստած երկնագույն ալկիոնը, որը 2019 թվականին Հայաստանի թռչունների պահպանման միության կողմից կազմակերպված հասարակական հարցման արդյունքում արժանացավ «Տարվա թռչուն» կոչմանը:
330 ՀՀ դրամ անվանական արժեքով նամականիշի վրա պատկերված է կովկասյան ընձառյուծը, քանի որ 2019 թվականը Հայաստանի Հանրապետության կառավարությունը հռչակել է ընձառյուծի տարի:
Կենդանիները պատկերված են իրենց բնորոշ միջավայրում` կատարված գեղարվեստական ոճով:
230 և 330 ՀՀ դրամ անվանական արժեքներով նամականիշները տպագրված են Ֆրանսիայի «Cartor» տպագրատանը` յուրաքանչյուրը 30 000 տպաքանակով: Նամականիշների դիզայնի հեղինակն է «ՀայՓոստ» ՓԲԸ-ի նկարիչ-դիզայներ Աշխեն (Միլա) Խանձրածյանը: