Հրշեջները մարել են Վարդենիսում բռնկված հրդեհը
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարության «911» ծառայությունը հոկտեմբերի 20-ին, ժամը 10։07-ին ահազանգ է ստացել, որ Գեղարքունիքի մարզի Վարդենիս քաղաքի Վարդան Մամիկոնյան փողոցում այրվում է տուն:
Դեպքի վայր է մեկնել ԱԻՆ փրկարար ծառայության մարզային փրկարարական վարչության հրշեջ-փրկարարական ջոկատի երկու մարտական հաշվարկ:
Պարզվել է, որ հրդեհը բռնկվել է Վիկտոր Համբարձումյան փողոցի վրա գտնվող շինությունում:
Ինչպես «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, հրդեհը մեկուսացվել է ժամը 10:30-ին, մարվել՝ 11:12-ին: Մասնակի այրվել են շինության տանիքի փայտյա կառուցատարրերը (մոտ 30 քմ):