Էրիկ Գրիգորյանը հերքում է իր՝ հանքարդյունաբերական ընկերությունում գործունեություն ծավալելու լուրերը
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: Շրջակա միջավայրի նախարար Էրիկ Գրիգորյանը հերքում իր՝ հանքարդյունաբերական որևէ ընկերությունում գործունեություն ծավալելու լուրերը:
«Կյանքումս որևէ հանքարդյունաբերական կազմակերպության համար չեմ աշխատել, չնայած վերջին 10 տարիներին շատ շատերից առաջարկներ եմ ստացել շատ մեծ հնարավորություններով ու աշխատավարձերով: Տարիներ առաջ աշխատել եմ բրիտանական մի խորհրդատվական կազմակերպության համար, որն աշխարհի լավագույն խորհրդատվական կազմակերպություններից մեկն է, աշխատում է մոտ 80 երկրներում:
Իրենց վերլուծությունների ժամանակ եղել են նաև վերլուծություններ, որ արել եմ «Լիդիանի», Զանգեզուրի, Ագարակի կոմբինատների համար, բայց երբևէ որևէ կերպ ես որևէ պարտավորություն չեմ ունեցել: Դա եղել է 2014-2015 թվականներին, իսկ ես 2011-2017 թվականներին պետական համակարգում չեմ եղել, եղել եմ միջազգային փորձագետ, աշխատել եմ նաև Համաշխարհային բանկում»,- «Արմենպրես»-ի հաղորդմամբ, ասաց նախարարը: