Դավիթ Բեգինյանը շնորհավորել է Արցախի հարկադիր կատարողներին մասնագիտական օրվա առթիվ
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ գլխավոր հարկադիր կատարողի ժամանակավոր պաշտոնակատար Դավիթ Բեգինյանը շնորհավորել է Արցախի Հանրապետության հարկադիր կատարողներին մասնագիտական օրվա առթիվ: Ինչպես «Արմենպրես»-ին հայտնեցին ՀՀ հարկադիր կատարման ծառայությունից, ուղերձում, մասնավորապես, ասված է.
«Հայաստանի Հանրապետության արդարադատության նախարարության հարկադիր կատարումն ապահովող ծառայության բոլոր աշխատակիցների և անձամբ իմ անունից ջերմորեն շնորհավորում եմ Արցախի Հանրապետության արդարադատության նախարարության դատական ակտերի հարկադիր կատարման ծառայության ողջ անձնակազմին` հարկադիր կատարողի օրվա առթիվ:
Վստահ եմ՝ ձեր մասնագիտական բարձր կարողությունների և փորձառության շնորհիվ հետագայում ևս հաջողությամբ կիրականացնեք Ծառայության առջև դրված խնդիրների լուծումն ու կնպաստեք ոլորտի հետագա զարգացմանը:
Կրկին շնորհավորում եմ մասնագիտական տոնի առթիվ, մաղթում եմ խաղաղություն, առողջություն և արգասաբեր գործունեություն՝ ի բարօրություն մեր ժողովրդի ու Հայրենիքի»: