Հայաստանը մասնակցում է դատապարտյալների միջև շախմատի միջազգային առաջին առցանց առաջնությանը
ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ։ՀՀ արդարադատության նախարարության «Արմավիր» քրեակատարողական հիմնարկում օգոստոսի 5-ին կայացել է արագ շախմատի առցանց միջազգային առաջնության առաջին փուլը, որը կազմակերպվել է ԱՄՆ-ի նախաձեռնությամբ՝ շախմատային 7 հզոր երկրների՝ Բրազիլիայի, ՌԴ, Անգլիայի, ԱՄՆ, Իտալիայի, Բելառուսի և Հայաստանի քրեակատարողական հիմնարկների ուժեղագույն շախմատիստ դատապարտյալների միջև: Ինչպես «Արմենպրես»-ին տեղեկացրին ՀՀ ԱՆ քրեակատարողական ծառայության հանրային կապերի բաժնից, Հայաստանի թիմը, որը կազմված էր «Արթիկ», «Արմավիր» և «Հրազդան» քրեակատարողական հիմնարկների լավագույն խաղացող 4 դատապարտյալներից, առաջին փուլում իր ուժերը չափել է Ռուսաստանի Դաշնության, Բրազիլիայի և Անգլիայի դատապարտյալների հետ: Անզիջում մրցամարտում Հայաստանի թիմը հաղթել է Բրազիլիայի և Անգլիայի թիմերին, սակայն պարտվել Ռուսաստանի Դաշնության թիմին։
Խաղին հետևում էին հայ շախմատիստ, գրոսմայստեր, Հայաստանի քառակի չեմպիոն, շախմատի ակադեմիայի հիմնադիր-նախագահ Սմբատ Լպուտյանը և միջազգային կարգի մրցավար Նորայր Քալանթարյանը, որը նախապատրաստում էր Հայաստանի դատապարտյալների թիմը խաղի առցանց ձևաչափին:
«Հիշեցնենք, որ վաղը՝ օգոստոսի 6-ին, կկայանա մասնակից պետությունների թիմային առաջնության եզրափակիչ փուլը, և կորոշվեն հաղթողները:
Նույն օրը տեղի կունենա նաև փակման արարողությունը, այնուհետև մասնակից պետությունների քրեակատարողական հիմնարկների ներկայացուցիչները տեսազանգի միջոցով ամփոփ կներկայացնեն տեղեկություն շախմատի զարգացման և ընթացքի մասին իրենց երկրների քրեակատարողական հիմնարկներում:
Նշենք, որ տարբեր երկրների քրեակատարողական հիմնարկների միջև նմանատիպ ձևաչափով մրցաշար կազմակերպվում է առաջին անգամ»,- նշված է հաղորդագրության մեջ: