Դեսպան Տիգրան Մկրտչյանը ծանոթացել է Դրուսկինինկայի զբոսաշրջային հնարավորություններին
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Լիտվայում ՀՀ դեսպան Տիգրան Մկրտչյանը հուլիսի 17-ին այցելեց Դրուսկինինկայի առողջարանային քաղաք, որտեղ հանդիպեց քաղաքապետ Ռիչարդաս Մալինաուսկասի (Ričardas Malinauskas) հետ։
Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից,հանդիպման սկզբում քաղաքապետ Մալինաուսկասը դեսպան Մկրտչյանին ներկայացրեց Դրուսկինինկայի զբոսաշրջային հնարավորություններն ու ենթակառուցվածքները, քաղաքի սոցիալ-տնտեսական զարգացման հիմնական ուղղությունները։
Դեսպան Մկրտչյանը նշեց, որ ՀՀ դեսպանությունը մեծապես կարևորում է Հայաստանի և Լիտվայի միջև ապակենտրոնացված համագործակցության զարգացումը և հույս հայտնեց, որ առաջիկայում այդ համագործակցությունը կներառի նաև Դրուսկինինկայը և Հայաստանի քաղաքներից որևէ մեկը: Դեսպանը ներկայացրեց նաև Հայաստանի առողջարանային քաղաքների ընդհանուր նկարագրությունն ու առանձնահատկությունները։
Կողմերն անդրադարձ կատարեցին նաև փոխադարձ այցելությունների կազմակերպմանը, երկու երկրների միջև առողջարանային զբոսաշրջության ոլորտի զարգացման հնարավորություններին, առաջիկայում համատեղ միջոցառումների անցկացմանը։