Ֆելիքս Ցոլակյանն ու ՀՀ-ում Արգենտինայի դեսպանը քննարկել են արտակարգ իրավիճակների բնագավառում համագործակցության հեռանկարները
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Արտակարգ իրավիճակների նախարար Ֆելիքս Ցոլակյանն հունիսի 24-ին ընդունեց ՀՀ-ում Արգենտինայի արտակարգ և լիազոր դեսպան Գոնսալո Ուռիոլաբեիտիային: Ինչպես «Արմենպրես»-ին հայտնեցին ՀՀ ԱԻՆ տեղեկատվության և հասարակայնության հետ կապերի վարչությունից, հանդիպման նպատակն էր քննարկել արտակարգ իրավիճակների բնագավառում հայ-արգենտինական համագործակցության հեռանկարները:
Ողջունելով հյուրերին՝ Ֆելիքս Ցոլակյանը նշեց, որ թեև մեր երկու երկրները ունեն պատմական, քաղաքական և տնտեսական խորը առնչություններ, սակայն Հայաստանի և Արգենտինայի արտակարգ իրավիճակների կառույցները տակավին չունեն համագործակցություն: Նա առաջարկեց ճանաչողական այցը դարձնել ապագա համագործակցության հիմք:
Նախարարը նշեց, որ աղետներ տեղի են ունենում ամենուրեք և հաճախ տարբեր երկրներում դրանք ունեն որոշակի ընդհանրություններ:
Այս առումով, Ֆելիքս Ցոլակյանը կարևորեց ուսանելի փորձի փոխանակումը:
Ի թիվս այլ հարցերի, նախարարը հիշատակեց Հայաստանում գործող հակակարկտային կայանների ներմուծումն Արգենտինայից և նշեց, որ դրանք ունեն արդյունավետության խնդիր:
Հնարավոր ռիսկերից խուսափելու համար՝ Ֆելիքս Ցոլակյանը կարևորեց կարկտապաշտպան ցանցերի ներդրումը և գյուղատնտեսության ապահովագրությունը:
Դեսպան Գոնսալո Ուռիոլաբեիտիան համոզմունք հայտնեց արտակարգ իրավիճակների ոլորտում համագործակցության անհրաժեշտության վերաբերյալ և առաջարկեց ստեղծել աշխատանքային խումբ՝ նախանշելու համագործակցության մասնագիտական ուղղությունները և հնարավոր աղերսները:
Դեսպանն ասաց, որ Արգենտինայում կարկուտի դեմ պայքարը սկսում են երկնքում և նախարար Ցոլակյանին առաջարկեց օգտվել Արգենտինայում արտադրվող ռադարներից, որոնք կարող են ուսումնասիրել մթնորորտի վիճակը:
Հանդիպման ավարտին կողմերը պայմանավորվեցին համագործակցությունը համարել սկսված և նպատակադրվեցին այսուհետ լինել առավել գործնական: