Հայկական միջազգային ակնաբուժական գիտաժողովը Երևան է բերելու բարձրակարգ մասնագետների տասներկու երկրից
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: «Երիտասարդ ակնաբույժների հայկական ասոցիացիայի» և «Համահայկական ակնաբույժների ասոցիացիայի» համատեղ երկրորդ տարեկան ակնաբուժական գիտաժողովին դասախոսություններով հանդես կգան մոտ 12 երկրից հրավիրված հանրաճանաչ պրոֆեսորներ, ակնաբույժներ:
«Արմենպրես»-ի հաղորդմամբ` գիտաժողովը, որն անցկացվելու է մայիսի 18-19-ին Երևանի «Իբիս» հյուրանոցում, կազմակերպվում է ՀՀ առողջապահության ոլորտի զարգացման ռազմավարության նպատակների հետ համահունչ:
Գիտաժողովին մասնակցելու է ՀՀ առողջապահության նախարարը, Բժշկական համալսարանի ռեկտորը, ՀՀ ԱՆ ազգային ինստիտուտի տնօրենը, Երևանի քաղաքապետարանի առողջապահության վարչությունը:
Միջոցառման կարևոր բաղկացուցիչ մասն է կազմում կենդանի վիրաբուժությունը «Live surgery»-ն, որի շնորհիվ համաժողովի մասնակիցները հնարավորություն կունենան օնլայն ռեժիմում հարցեր ուղղել վիրաբույժներին:
Գիտաժողովը շարունակական մասնագիտական կրթության լիարժեք մաս է, որի նպատակն է կազմակերպել ակնաբուժության արդիական թեմաների վերաբերյալ թրեյնինգներ: Գիտաժողովը կրեդիտավորված է ՀՀ Առողջապահության Նախարարության կողմից: