ԵՐԵՎԱՆ, 8 ԱՊՐԻԼԻ, ԱՐՄԵՆՊՐԵՍ: Հովհաննես Գաբուզյանը դարձել է ԱՄՆ ուսանողական թիմերի առաջնության հաղթող:

«Արմենպրես»-ի հաղորդմամբ` Հայաստանի 2017 թվականի չեմպիոն, գրոսմայստեր Հովհաննես Գաբուզյանն անվճար հիմունքներով և ամբողջական կրթաթոշակով սովորում է ԱՄՆ Տեխաս նահանգի Ռիո Գրանդ Վելլի համալսարանում: Գրոսմայստերն ընդգրկվել է նաև համալսարանի շախմատի թիմի կազմում: Գրանդ Վելլիի թիմը երկրորդ անգամ անընդմեջ դարձել է ԱՄՆ ուսանողական թիմային առաջնության չեմպիոն: Եզրափակիչում Գաբուզյանի թիմը 2.5։1.5 հաշվով հաղթանակ տոնեց ուսանողական առաջնության 6-ակի չեմպիոն Վեբստերի համալսարանի նկատմամբ:

Թիմի համար հաղթական միավորը վաստակեց Հովհաննես Գաբուզյանը, ով առավելության հասավ Վեբսթերի համալսարանի ուսանող, Ադրբեջանը ներկայացնող գրոսմայստեր Վասիֆ Դուրաբեյլիի նկատմամբ: Մյուս երեք պարտիաներն ավարտվեցին հաշտությամբ: Բացի Գաբուզյանից՝ թիմի կազմում հանդես էին գալիս գրոսմայստերներ Վլադիմիր Բելոուսը, Անդրեյ Ստուկոպինը և Կամիլ Դրագունը: Հիշեցնենք, որ Գաբուզյանի թիմն անցյալ տարի ևս նվաճել էր չեմպիոնի տիտղոսը: