ՀՀ դեսպանը Չեխիայի ԱԳ փոխնախարարի հետ հանդիպմանը կարևորել է ԵՄ- Հայաստան ՀԸԳ պայմանագրի վավերացումը
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Չեխիայում ՀՀ դեսպան Աշոտ Հովակիմյանը մարտի 22-ին հանդիպել է ՉՀ արտաքին գործերի նախարարի իրավական և հյուպատոսական հարցերով տեղակալ Մարտին Սմոլեկի (Martin Smolek) հետ։ Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, նախարարի տեղակալը ողջունել է նորանշանակ դեսպանին պաշտոնի ստանձնման կապակցությամբ։ Քննարկվել են հայ-չեխական երկկողմ պայմանագրային դաշտի իրավիճակը և մի շարք հյուպատոսական հարցեր։
Դեսպանը հատուկ ուշադրություն է դարձրել ԵՄ-ի հետ հարաբերությունների գործընթացին` կարևորելով ՉՀ խորհրդարանի կողմից ԵՄ-Հայաստան համապարփակ և ընդլայնված գործընկերության պայմանագրի (CEPA) վավերացման գործընթացի արագացումը, ինչպես նաև Չեխիայի հետ ԵՄ-Հայաստան մուտքի արտոնագրերի ազատականացման գործընթացի վերաբերյալ բանակցությունների մեկնարկը։