Գրոսմայստեր Կարեն Գրիգորյանը և Վահե Դանիելյանը Իրանի մրցաշարի առաջատարից հետ են կես միավորով
ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Իրանում ընթացող շախմատի «Կարուն Մասթերս» մրցաշարի առաջատարների թվում նաև Հայաստանի ներկայացուցիչներն են:
«Արմենպրես»-ի փոխանցմամբ` մրցաշարի 5-րդ տուրում Կարեն Գրիգորյանը, Վահե Դանիելյանը և Գրիգոր Դիլանյանը հաղթանակներ տոնեցին: Պարտություն կրեց Սուսաննա Գաբոյանը:
Այժմ 5 հնարավորից հավաքելով 4-ական միավոր՝ Կարեն Գրիգորյանը և Վահե Դանիելյանը կեսական միավոր են զիջում մրցաշարային աղյուսակի առաջատարին:
Իրանի մրցաշարին մասնակցում են 11 երկրի 53 շախմատիստ, այդ թվում՝ 6 գրոսմայստեր: Մրցաշարում Հայաստանը ներկայացնում են գրոսմայստեր Կարեն Գրիգորյանը, ով նաև մրցաշարի առաջին դասակարգված շախմատիստն է, կանանց միջազգային վարպետ Սուսաննա Գաբոյանը և ՖԻԴԵ-ի վարպետներ Գրիգոր Դիլանյանն ու Վահե Դանիելյանը:
Մրցաշարի ավարտին մնացել է 4 տուր: