ՀԾԿՀ-ն կքննարկի «Գազպրոմ Արմենիա»-ին նախազգուշացնելու և «Վեոլիա Ջուր»-ին տուգանելու հարցը
ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Հանրային ծառայությունները կարգավորող հանձնաժողովը կքննարկի «Գազպրոմ Արմենիա»-ին նախազգուշացնելու և «Վեոլիա Ջուր» ընկերությանը տուգանելու հարցը:
Ինչպես հաղորդում է «Արմենպրես»-ը, համապատասխան նախագծերն ընդգրկված են Հանրային ծառայությունները կարգավորող հանձնաժողովի՝ փետրվարի 6-ի նիստի օրակարգում:
«Գազպրոմ Արմենիա»-ին նախազգուշացնելու մասին նախագծում նշված է, որ «Գազպրոմ Արմենիա» փակ բաժնետիրական ընկերությունը «Հրազդան-5» կայանի գործունեության մասով 2018 թվականի նոյեմբեր ամսվա արդյունքներով տեղեկատվությունը հանձնաժողով է ներկայացրել ժամկետի խախտմամբ: Հանձնաժողովը որոշմամբ սահմանված ժամկետի խախտման փաստի ուսումնասիրման նպատակով 2019 թվականի հունվարի 9-ից ընկերության նկատմամբ հարուցել է վարչական վարույթ:
«Վեոլիա Ջուր» ընկերությանը տուգանելու մասին նախագծի համաձայն՝ ՀԾԿՀ-ն նախատեսում է թույլ տրված խախտումների համար ընկերությանը տուգանել 10 միլիոն դրամով: