«Էրեբունի» բասկետբոլային ակումբի անդամները ներքին առաջնությունը դիտարժան են համարում
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: «Էրեբունի» բասկետբոլային ակումբի ամերիկացի խաղացողները Հայաստանի կանոնավոր առաջնությունը մրցունակ են համարում:
«Մենք մեծ հնարավորություններ ունենք հաղթելու կանոնավոր առաջնությունում, քանի որ ունենք լավ թիմ: Մենք լավ թիմն ունենք, հակառակորդ թիմերը ևս ուժեղ են»,-«Արմենպրես»-ի հաղորդմամբ` լրագրողների հետ հանդիպման ժամանակ ասաց Ջոնաթան Մըքգին:
Նրա խաղընկեր Թորի Վաշինգթոնի կարծիքով, առաջնությունում հաղթելու հնարավորություն ունեն բոլոր թիմերը: «Էրեբունի»-ն կարծես մեկ ընտանիք է: Իսկ Հայաստանի կանոնավոր առաջնությունում մեծ հետաքրքրություն են ներկայացնում բոլոր թիմերը»,-շեշտեց Վաշինգթոնը:
Հայաստանի բասկետբոլի կանոնավոր առաջնության առաջատարն անփոփոխ է: Առաջին տեղում «Արագած»-ն է, որն ունի 18 միավոր: Երկրորդ տեղում 17 միավորով «Ուրարտու»-ն է: Եռյակը 16 միավորով եզրափակում է «Արթիկ»-ը: ՖԻՄԱ-ն, «Էրեբունի»-ն և «Արցախ»-ն ունեն 13-ական միավոր: Ա լիգայի երրորդ շրջանը կմեկնարկի դեկտեմբերի 15-ին, տեղի կունենան հետևյալ հանդիպումները. «Ուրարտու»-«Էրեբունի Սեդարս», ՖԻՄԱ-«Արցախ», «Արթիկ» –«Արագած»: