Դիտորդն անհրաժեշտ է համարում քրեակատարողական հիմնարկների հաստիքների համալրումը
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության քրեակատարողական հիմնարկներում հաստիքների ոչ բավարար համալրվածությունը պայմանավորված է համապատասխան սոցիալական երաշխիքներ չունենալով:
«Արմենպրես»-ի հաղորդմամբ՝ լրագրողների հետ զրույցում այս մասին նշեց ՀՀ արդարադատության նախարարության քրեակատարողական հիմնարկներում հասարակական վերահսկողություն իրականացնող Դիտորդների խմբի նախագահ Հասմիկ Հարությունյանը:
«Քրեակատարողական հիմնարկներում մենք հանդիպում ենք դեպքերի, որ հաստիքները բավարար համալրվածություն չունեն: Այդ փաստը պայմանավորված է մի քանի հանգամանքով՝ ոչ բավարար սոցիալական երաշխիքները, ինչին զուգորդվում է ծանր աշխատանքը՝ երբեմն նաև չկանոնակարգված գրաֆիկով: Նման պայմաններում, եթե անձը չունի բավարար սոցիալական երաշխիքներ, պետք է գործ ունենա բավականին բարդ ոլորտի հետ, և տրամաբանական է, որ անձինք խուսափում են ՔԿՀ-ներ աշխատանքի անցնելուց»,- ընդգծեց Հարությունյանը և հավելեց, որ այս խնդիրը վերացնելու համար պետք է գործնական քայլեր ձեռնարկվեն: