Մեծ-մեծ խոսողներին պետք է այդ «տուշոնկաները» տալ, ասել՝ կեր և քարոզարշավն արա. Փաշինյանն անդրադարձավ ԶՈւ-ում տրամադրվող սննդի որակին
ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Վարչապետի պաշտոնակատար Նիկոլ Փաշինյանը զինված ուժերում տրամադրվող սննդի որակից գոհ չէ: Այդ մասին Փաշինյանն ասաց կառավարությունում լրագրողների հետ հանդիպման ժամանակ:
«Ես ինքս ուտելիքից գոհ չեմ, քանի անգամ գնացել եմ դիրքեր, ասել եմ, որ սարսափելի է: Այդ խնդրով զբաղվել ենք, զբաղվում ենք և պետք է զբաղվենք, բայց պետք է հասկանանք, որ մեկ օրում այդ ծավալի հարցերը չեն կարգավորվի»,- «Արմենպրես»-ի հաղորդմամբ, ասաց վարչապետի պաշտոնակատարը՝ ավելացնելով, որ զինծառայողների ներքնաշորերի հետ կապված մեխանիզմի փոփոխություն ևս իրականացվում է:
«Այո, այստեղ խնդիրներ ունենք: Եվ ոչ միայն այստեղ: Մարդիկ կան, ովքեր մեծ-մեծ խոսում են, պետք է նրանց այդ «տուշոնկաները» տալ, ասել՝ կեր և քարոզարշավն արա»,- ասաց Նիկոլ Փաշինյանը: