Ուրցաձորում տեղի է ունեցել համայնքային զարգացման նախաձեռնությունների ամփոփման և պաշտոնական բացման միջոցառումը
ԵՐԵՎԱՆ, 14 ՍԵՊՏԵՄԲԵՐ, ԱՐՄԵՆՊՐԵՍ: Տարածքային կառավարման և զարգացման նախարարության տեղական ինքնակառավարման քաղաքականության վարչության պետ Աշոտ Գիլոյանն այսօր մասնակցել է Արարատի մարզի Ուրցաձոր խոշորացված համայնքում իրականացված համայնքային զարգացման նախաձեռնությունների ամփոփման և պաշտոնական բացման միջոցառմանը:
Ինչպես «Արմենպրես»-ին տեղեկացրին ՀՀ տարածքային կառավարման և զարգացման նախարարության լրատվության եւ հասարակայնության հետ կապերի վարչությունից, միջոցառումն անցկացվում էր «Գործընկերություն և ուսուցում» /ԳՈՒՄ ՀԿ-ի ջանքերով ` Եվրոպական միության կողմից համաֆինանսավորվող` «Աջակցություն Հայաստանի Հանրապետության ՔՀԿ-ների կարողությունների հզորացմանը» ծրագրի` «Երիտասարդները որպես համայնքային փոփոխությունների դերակատարներ» փոքր դրամաշնորհային նախագծի շրջանակում:
Համայնքային զարգացման նախաձեռնությունների ամփոփման և պաշտոնական բացման միջոցառմանը մասնակցել են «Երիտասարդները որպես համայնքային փոփոխությունների դերակատարներ» փոքր դրամաշնորհային նախագծի շահառու երիտասարդները, Ուրցաձոր համայնքի տեղական ինքնակառավարման մարմինների ներկայացուցիչները, տեղական և միջազգային կազմակերպությունների ներկայացուցիչները, ՏԿԶ նախարարությունում պրակտիկա անցնող երիտասարդները և այլ շահագրգիռ անձինք:
Տոնական միջոցառման ընթացքում հյուրերը մասնակցել են «Ուրցաձորի երիտասարդական նախաձեռնությունների կենտրոնի», ինչպես նաև համայնքի 3 բնակավայրերի տրանսպորտային կանգառների և համայնքային մարզադաշտի բացման արարողությանը: