ԱԺ-ն քննիչ հանձնաժողով ստեղծելու նպատակով անցկացնելու է արտահերթ նիստ
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ԱԺ-ն քննիչ հանձնաժողով ստեղծելու նպատակով սեպտեմբերի 13-ի հերթական նիստի ավարտից հետո կանցկացնի արտահերթ նիստ:
«Արմենպրես»-ի հաղորդմամբ` այս մասին նիստում ասաց ԱԺ նախագահ Արա Բաբլոյանը:
«ԱԺ կանոնակարգի համապատասխան հոդվածի համաձայն, ԱԺ պատգամավորների ընդհանուր թվի առնվազն մեկ քառորդը դիմել է ինձ` արդարադատության իրականացմանը խոչընդոտելու, արդար դատաքննության իրավունքի և հեռախոսային խոսակցությունների գաղտնիությունը խախտելու փաստի մասին հարցերի ուսումնասիրության նպատակով քննիչ հանձնաժողով ստեղծելու համար»,-ասաց նա ու տեղեկացրեց` հերթական նիստի ավարտից հետո պատգամավորների նախաձեռնությամբ հրավիրվում է ԱԺ արտահերթ նիստ:
Հանձնաժողովը ստեղծվում է իրավունքի ուժով: Իսկ հանձնաժողովի անդամների թիվը սահմանվում է ԱԺ որոշմամբ:
Ավելի վաղ` սեպտեմբերի 11-ի նիստում նման հանձնաժողով ստեղծելու առաջարկությամբ հանդես էր եկել ՀՀԿ-ական պատգամավոր Արմեն Աշոտյանը`քննելու ԱԱԾ և ՀՔԾ պետերի խոսակցության գաղտնալսման մանրամասները: