«Ազատ Դեմոկրատներ» կուսակցությունը չի մասնակցի Երևանի ավագանու ընտրություններին


ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: «Ազատ Դեմոկրատներ» կուսակցությունը հայտարարել է Երևանի ավագանու արտահերթ ընտրություններին չմասնակցելու և Ազգային ժողովի սպասվելիք ընտրություններին մասնակցելուն նախապատրաստվելու մասին: Ինչպես հաղորդում է «Արմենպրես»-ը, նման որոշում է կայացվել կուսակցության վարչության նիստի ընթացքում, որի արդյունքներով կուսակցությունը հայտարարություն է տարածել:

«Այսօր տեղի է ունեցել «Ազատ Դեմոկրատներ» կուսակցության վարչության նիստը, որի ընթացքում քննարկվել են ՀՀ ներքին և արտաքին քաղաքականությանն առնչվող մի շարք հարցեր, մասնավորապես անդրադարձ է կատարվել Երևանի ավագանու ընտրություններին կուսակցության մասնակցության նպատակահարմարության խնդրին։

Ամփոփելով կուսակցության վարչության նախորդ նիստերի և կուսակցության Երևանի տարածքային կառույցների հետ անցկացված քննարկումները, Ազատ Դեմոկրատներ կուսակցությունը որոշում է կայացրել չմասնակցել Երևանի ավագանու ընտրություններին՝ հաշվի առնելով ներքոնշյալ հանգամանքները․

Երևանի ավագանու ընտրությունները, որը թավշյա հեղափոխությունից հետո ՀՀ-ում կայանալիք առաջին ընտրական գործընթացն է և փաստացիորեն նախորդելու է ԱԺ արտահերթ ընտրություններին, մեր գնահատմամբ ընթանալու է բոլորովին այլ քաղաքական տրամաբանության շրջանակներում և դրա քաղաքական նշանակությունն էլ այլ է լինելու։ Ստեղծված իրավիճակում այդ ընտրությունները Հայասանում սկիզբ առած փոփոխությունների ընթացքի մի մասն են, սակայն այս ընտրություններով չէ, որ հանգուցալուծվելու է Հայաստանում իշխանափոխության գործընթացը։

Աջակցելով մեր երկրում սկսված փոփոխություններին, Ազատ Դեմոկրատներ կուսակցությունը համարում է, որ Հայաստանում ՀՀ քաղաքացիների իշխանության հաստատման համար ամենակարևոր քաղաքական գործընթացը լինելու է առաջիկայում կայանալիք ԱԺ արտահերթ ընտրությունները, որի ընթացքն ու արդյունքներն են դառնալու ՀՀ-ում ժողովրդավարության ամրապնդման և բարեփոխումների իրականացման անհրաժեշտ երաշխիքը։   

Ուստի, հաջողություն մաղթելով Երևանի ավագանու ընտրություններին մասնակցող բոլոր քաղաքական ուժերին, Ազատ Դեմոկրատներ կուսակցությունն հայտարարում է, որ կենտրոնացնելով իր ողջ ներուժը՝ սկսում է պատրաստվել ԱԺ արտահերթ ընտրություններին և առաջիկայում հանդես կգա նոր նախաձեռնություններով և ՀՀ քաղաքացիներին կներկայացնի Հայաստանի զարգացման իր տեսլականը»,- ասված է կուսակցության տարածած հայտարարության մեջ։



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am