Էդմոն Մարուքյանը հավաստիացնում է`«Ելք»-ում քաղաքապետի թեկնածու առաջադրելու անհամաձայնություններ չեն եղել
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Երևանի ավագանու ընտրություններին «Լուսավոր Հայաստան»-ի և «Հանրապետության» դաշինքով մասնակցելու և քաղաքապետի թեկնածու առաջադրելու շուրջ «Ելք»-ում անհամաձայնություններ չեն եղել:
«Արմենպրես»-ի հաղորդմամբ` լրագրողների հետ զրույցում այս մասին հավաստիացրեց ՀՀ ԱԺ «Ելք» խմբակցության պատգամավոր Էդմոն Մարուքյանը:
«Երկար քննարկում է եղել: Որոշվել է` «Ելք»-ից կառաջադրվի առանձին թեկնածու: Եվ մենք` երկու ուժերով մասնակցելու համար ստեղծեցինք նոր բրենդ` «Լույս» դաշինքը: Կարելի է ասել` այս պահին «Ելք»-ից կա երկու թեկնածու: Սա նաև մարտավարական քայլ է: Անհամաձայնություններ չեն եղել: Մենք դաշանակիցներ ենք: Ապագա համագործակցության դուռը բաց է մեզ համար»,-ասաց Մարուքյանը:
Նրա կարծիքով` քաղաքապետի բոլոր թեկնածուներն էլ լուրջ մրցակիցներ են: Կարծում է` Արտակ Զեյնալյանը և նրա թիմը հզոր ուժ են: Եվ, հետևաբար, իրենք լավ շանսեր ունեն: Հավաստիացրեց` լինելու են արդար ընտրություններ: