ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Թուրինի «Յուվենթուս»-ը երկարաձգել է պայմանագրի ժամկետը կիսապաշտպան Միրալեմ Պյանիչի հետ: Ինչպես փոխանցում է «Արմենպրես»-ը, կողմերի միջև կնքված պայմանագրի ժամկետը նախատեսված է մինչև 2023 թվականը: Նախորդը լրանում էր 2021 թվականին:

Ավելի վաղ հաղորդվում էր, որ Պյանիչը նոր պայմանագրով կստանա տարեկան 7 մլն եվրո աշխատավարձ:

Բոսնիացի ֆուտբոլիստի ծառայություններով ակտիվորեն հետաքրքրված էր կատալոնական «Բարսելոնա»-ն: Հաղորդվում էր նաև, որ Իտալիայի չեմպիոնը հրաժարվել էր վաճառել Պյանիչի տրանսֆերը Մադրիդի «Ռեալ»-ին 60 մլն եվրոյի դիմաց:

Նախորդ մրցաշրջանում Պյանիչը մասնակցել էր 31 հանդիպման, դարձել 5 գոլի և 8 գոլային փոխանցման հեղինակ: Բոսնիացին պաշտպանում է «Յուվենթուս»-ի գույները 2016 թվականից: