Առողջապահության նախարարի համար ոլորտի առաջնահերթություններից մեկն առաջնային օղակի ուժեղացումն է
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: Ուռուցքաբանական հիվանդությունների վաղ հայտնաբերումը , կանխարգելումը և բուժումը, ինչպես նաև առաջնային օղակի ուժեղացումը առողջապահական ոլորտի առաջնահերթությունները պետք է լինեն: «Արմենպրես»-ի հաղորդմամբ՝ այս մասին «Լոֆթ» ինքնազարգացման ու ժամանցի կենտրոնում հանդիպում-զրույցի ժամանակ ասաց ՀՀ առողջապահության նախարար Արսեն Թորոսյանը:
Նրա խոսքով՝առողջապահության ֆինանսական հոսքերը պետք է ուղղվեն դեպի առաջնային օղակ և ոչ թե հոսպիտալային օղակ, ինչպես հիմա է: « Ուռուցքաբանական հիվանդությունների վաղ հայտնաբերման , կանխարգելման և բուժման մի մասը պետք է անի առաջնային օղակը, սկսած ՊԱՊ թեստի կատարելագործումից, վերջացրած երկու նոր սկրինինգային ծրագրերով, դա կոլոռեկտալ քաղցկեղն է և կրծքագեղձի քաղցկեղը, որոնք եթե կարողանանք աշխատեցնել, մենք շատ լուրջ արդյունքներ կունենանք»,-ասաց նա:
Անդրադառնալով բժշկական զբոսաշրջությանը, նախարարն ասաց, որ Հայաստանում այդ առումով առաջատարները ստոմատոլոգիան և պլաստիկ վիրահատություններն են:
«Բժիշկների պատրաստվածության և ֆինանսավորման առումով Հայաստանում ստոմատոլոգիան բավական լավ դիրքեր ունի: Մենք չենք կարող չընդունել, որ այդ ոլորտը բավական լավ ֆինանսավորվում է: Խնդիրները համավճարների մասով են»,-ասաց նախարարը: