Բուսաբանական այգում ծառահատումների վերաբերյալ լուրերն ապատեղեկատվություն են. պարզաբանում է այգու տնօրինությունը
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Երևանի բուսաբանական այգում 500 ծառի հատման վերաբերյալ լուրերը չեն համապատասխանում իրականությանը: Այս մասին հայտնում է ՀՀ ԳԱԱ Ա. Թախտաջյանի անվան բուսաբանության ինստիտուտի տնօրինությունը՝ «Արմենպրես»-ին տրամադրված հաղորդագրության միջոցով:
Նշվում է, որ այգում ոչ մի ծառ չի հատվել, այլ հակառակը` մարտ ամսին հենց 500 ծառ տնկվել է` կաղնի, սոճի, հացենի, թխկի և դրանք մոտ 3-4 տարեկան են:
ՀՀ ԳԱԱ Բուսաբանության ինստիտուտի Հայաստանի անտառային տեսակների արդեն իսկ նախկին տնկարանի տարածքում 2013 թվականին իրականացվել է ծրագիր, որի նպատակն է եղել ծառեր աճեցնել, ապա վերաբնակեցնել անտառային տարածքներում: Այդ պայմանագիրն ավարտվել է 2015 թվականին:
«Մենք տեսագրություն ունենք, որ այս տարածքում, որի վերաբերյալ ահազանգեր կան` ծառեր չեն հատվել, քանի որ այնտեղ ծառ չի էլ եղել: Այդ տարածքում, որն ամայի է` ժամանակավոր երկաթե կոնստրուկցիա է կառուցվել: Այն մոտ 3 ամիս` ամառային սեզենին, ծառայելու է տարբեր միջոցառումների, կոնֆերանսների, գուցե և համերգների համար, ինչից հետո կապամոնտաժվի: Միայն հատակ է լինելու և վերևում փակող ոչինչ չի լինելու»,- նշված է հաղորդագրությունում:
Առաջիկայում նախատեսվում է Բուսաբանական այգում 100 սոճի տնկել:
Լիլիթ Դեմուրյան
Լուսանկարներն ու տեսանյութը` ՀՀ ԳԱԱ Ա. Թախտաջյանի անվան բուսաբանության ինստիտուտի