Մասնագետներն առողջության պահպանման գործում մեծապես կարևորում են ոչ միայն բժիշկների, այլ նաև պացիենտների աշխատանքը
ԵՐԵՎԱՆ, 7 ԱՊՐԻԼԻ, ԱՐՄԵՆՊՐԵՍ: Յուրաքանչյուր մարդ մեծ լումա ունի թե իր, թե շրջապատի առողջության պահպանման գործում: Այն ոչ միայն համապատասխան գերատեսչությունների և կազմակերպությունների, այլ նաև մարդկանց աշխատանք է պահանջում:
«Արմենպրես»-ի հաղորդմամբ՝ Առողջապահության համաշխարհային օրվան ապրիլի 7-ին նվիրված ասուլիսում նման կարծիք հայտնեցին մասնագետները:
«Առողջապահության համաշխարհային օրվա հիմքում ամեն տարի մի իմաստ է դրվում: Եվ այն փորձում են տարվա ընթացքում առաջ տանել աշխարհով մեկ: Այս տարվա կարգախոսն է «Առողջապահական ծառայությունների համընդհանուր ծածկույթի ապահովում. բոլորին, ամենուր»: Երկրագնդի բնակչության մոտ կեսը դեռ զրկված է լիարժեք առողջապահական ծառայություններ ստանալու հնարավորությունից: Հայաստանում այդ խնդիրը նույնպես առկա է: Առողջապահական ծառայությունները չպետք է դառնան այնպիսի ֆինանսական բեռ, որ մարդն աղքատանա: Տարեկան մոտ 100 մլն մարդ աղքատանում է առողջապահական ծախսերի պատճառով»,-ասաց հանրային առողջության մասնագետ Արսեն Թորոսյանը:
Նրա կարծիքով՝ պետք է ապահովված լինի նաև առողջապահական ծառայությունների աշխարհագրական հասանելիությունը: Կան երկրներ, որտեղ բժիշկները շատ քիչ են:
Սրտաբան Տիգրան Աստվածատրյանը նշեց, որ յուրաքանչյուրն իր և շրջապատի առողջության պահպանման մեջ մեծ լումա ունի: Անհրաժեշտ է հետևել բժիշկների՝ առողջ ապրելակերպ վարելու, առողջ սննդի, ֆիզիկական ակտիվությանը հետևելու խորհուրդներին: «Ցավոք, այսօր շատ քիչ մարդիկ են կատարում դրանք: Խնդիրը ոչ միայն առողջապահության կազմակերպիչներինը, այլ նաև մարդկանցն է: Նրանք պետք է կատարեն այն, ինչ օգտակար է իրենց առողջությանը»,-ասաց նա:
Որպես սրտաբան փաստեց՝ թե ծխելու, թե ավելորդ քաշի և ֆիզիկական ակտիվության սահմանափակման դեմ պայքարը շատ դժվար է: Սակայն նկատեց նաև, որ վերջին տարիներին թե նախարարության, թե այլ կառույցների կողմից մեծ աշխատանք է կատարվում այդ ուղղությամբ:
ՀՀ առողջապահության նախարարության գլխավոր թոքաբան Անդրանիկ Ոսկանյանի կարծիքով ևս առողջապահական կազմակերպությունները պետք է հատուկ աշխատանք կատարեն, որպեսզի ոգևորեն մարդկանց՝ ունենալու այդ ձգտումը: «Բժշկին այցելելուց զատ հիվանդը պարտավոր է կատարել նրա ցուցումները: Պետք է լինի մոտիվացում, որ անձը ցանկանա հետևել իրեն: Անհրաժեշտ է նաև ավելի շատ ներկայացնել այն երկրները, որտեղ առողջության ավելի բարձր մակարդակ ունի»,-եզրափակեց նա: