Հազարից ավելի զինվորականներ են մասնակցում Հայաստանի ռուսական ռազմակայանի զորավարժություններին
ԵՐԵՎԱՆ, 2 ԱՊՐԻԼԻ, ԱՐՄԵՆՊՐԵՍ: Հայաստանի ռուսական ռազմակայանի ստորաբաժանումների հազարից ավելի զինծառայողներ են մասնակցում «Ալագյազ» բարձրլեռնային զորափորձարանում ծավալված վարժանքներին: Այդ մասին, ինչպես տեղեկացնում Է «Արմենպրես»-ը, հայտնել են ՌԴ Հարավային ռազմական օկրուգի մամուլի ծառայությունում:
«Երկկողմ մարտավարական վարժանքներին մասնակցում են հազարից ավելի զինծառայողներ եւ գործի Է դրված շուրջ 300 միավոր ռազմական տեխնիկա, այդ թվում՝ կործանիչներ, բանակային եւ անօդաչու ավիացիա»,-նշել են մամուլի ծառայությունում: Մեկ շաբաթվա ընթացքում հազարից ավելի զինծառայողներ՝ զորամիավորման հրամանատար գնդապետ Վլադիմիր Ելկանովի ղեկավարությամբ, մարտավարական գործողություններ կփորձարկեն հրետանու, հակաօդային պաշտպանության եւ ավիացիայի աջակցությամբ:
Զորավարժությունների ընթացքում գործի կդրվեն անօդաչուներ: Վարժանքների ընթացքում զինծառայողները կկատարեն ժայռոտ բարձլեռնային տեղանքի պայմաններում վարման ստուգարքային վարժություններ, մարտական հրաձգություն կիրականացնեն հրաձգային զենքից, նռնականետներից, հետեւակի մարտական մեքենաների, տանկերի սպառազինությունից, հրետանային եւ զենիթահրթիռային թնդանոթներից: