«Ուրարտու»-ի 3 բասկետբոլիստ հեռացվել է ակումբից
ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ: Երևանի «Ուրարտու» բասկետբոլային ակումբի երեք անդամ հեռացվել է ակումբից:
«Արմենպրես»-ի հաղորդմամբ` Ա լիգայում հանդես եկող «Ուրարտու» ակումբի բասկետբոլիստներ Կարեն Հայրապետյանը, Տոնի Կարամանուկյանը և Արամայիս Մայիլյանը հեռացվել են ակումբի հայտացուցակից և չեն շարունակի ելույթները «Ուրարտու» ակումբում:
«Նրանցից յուրաքանչյուրի հետ ունեցել ենք օբյեկտիվ և սուբյեկտիվ խնդիրներ: Բայց մենք շնորհակալ ենք նրանց, որ օգնեցին թիմին հաղթանակներ տոնել և հաջողություն ենք մաղթում հետագա սպորտային կարիերայում: Մենք փլեյ-օֆֆից առաջ ուժեղացնելու ենք թիմը արտասահմանցի բասկետբոլիստներով: Այնպես որ, սպասեք ավելի ուժեղ «Ուրարտու»-ի»,-«Արմենպրես»-ի հետ զրույցում ասաց «Ուրարտու» ակումբի նախագահ Կարեն Գիլոյանը:
Ա լիգայի 1/4 տուրից առաջ նրանցից յուրաքանչյուրը կարող է հայտավորվել մեկ այլ թիմում: