ԱՐՏԱՇԱՏ, 28 ՀՈՒՆՎԱՐԻ, ԱՐՄԵՆՊՐԵՍ: Արտաշատի զորամասում նշեցին ՀՀ բանակի 26-ամյակը:«Երբ 26 տարի առաջ նոր էր ստեղծվում Հայոց բանակը, մենք անշուշտ սպասում էինք, որ այն կդառնա մարտունակ, առնական ու այնպիսի կեցվածքով, որ հարգանք ու պատկառանք կներշնչի յուրաքանչյուրին»,- Զինված ուժերի կազմավորման 26-րդ տարեդարձի կապակցությամբ զինվորներն, հրամկազմին ու ծնողներին շնորհավորելով՝ ասաց Արտաշատի կապի ուսումնական զորամասի հրամանատար, փոխգնդապետ Նիկոլ Խոջոյանը: «Արմենպրես»-ի փոխանցմամբ՝ տոնական օրը զորամասում սկսվեց հանդիսավոր տողանով: Զինվորները խրոխտ կեցվածքով անցան շարահրապարակով՝ փողային նվագախմբի հնչյունների ներքո: Միջոցառմանը ներկա էին ԵԿՄ անդամները, քաղաքապետ Կարեն Բենիամինյանը, Սբ Հովհաննես Ավետարանիչ եկեղեցու հոգեւոր հովիվ Տեր Թաթուլ քահանա Գասպարյանը: Զինվորներին շնորհավորեց Արտաշատի քաղաքապետ Կարեն Բենիամինյանը: Նա ասաց, որ մեր անկախ հանրապետության կարեւորագույն նվաճումներից է ՀՀ բանակը: Այն բազմիցս ապացուցել է թշնամուն, որ «կրակի հետ խաղ անել չի կարելի»: Ու երբ փորձել են՝ «այրվել են ու մոխրացել»:Փոխգնդապետ Նիկոլ Խոջոյանը լավագույն ծառայության համար մի շարք սերժանտների, հրամանատարների, շարքայինների հանձնեց պատվոգրեր, շնորհակալագրեր, իսկ մի խումբ զինվորներ ստացան կարճաժամկետ արձակուրդ: Իսկ շնորհակալական նամակները զորամասի կողմից արդեն նախօրորք ուղարկվել էին ծնողներին, դպրոցներին, զինկոմիսարիատներին: Շքերթի ավարտին շարահրապարակից յուրաքանչյուր վաշտ հեռացավ իր մարտական քայլերգով: Արտաշատի Շառլ Ազնավուրի անվան մշակույթի կենտրոնի գեղարվեստական խմբի ուժերով զորամասի դահլիճում կազմակերպված տոնական համերգին (կազմակերպիչ՝ Լիանուշ Աղախանյան) մասնակցեցին ծնողները, զինվորները, ողջ հրամկազմը: Տոնական համերգին հաջորդեց տոնական ճաշկերույթը:

Լիլիթ Մաճկալյան