Դավիթ Հարությունյանը կարևորեց էլեկտրոնային գործիքների կիրառումը կոռուպցիայի դեմ պայքարում
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Կոռուպցիայի դեմ պայքարը պետք չէ սահմանափակել միայն օրենսդրական աշխատաքներով: Հակակոռուպցիոն մարմնի ծրագրային կետերից մեկը ուղված է լինելու հանրության իրավագիտության մակարդակի բարձրացմանը:
«Արմենպրես»-ի հաղորդմամբ` նոյեմբերի 27-ին «Կոռուպցիայի կանխարգելումը և մարդու իրավունքների պաշտպանությունը» խորագիրը կրող համաժողովի ժամանակ նման կարծիք հայտնեց ՀՀ արդարադատության նախարար Դավիթ Հարությունյանը:
Նախարարի խոսքով` օրենսդրության կիրառումը ոչ պակաս կարևոր է, և որպեսզի այն իրականացվի, առաջին հերթին պետք է փոխվի հանրության իրավագիտակցությունը:
«Այս առումով մեծ հույսեր ենք կապում կոռուպցիայի կանխարգելման մարմնի հետ, որի կարևորագույն ծրագրային կետերից մեկը հանրային կրթություն է: Չփոխվի մեր իրավագիտակցությունը՝ այս բոլոր գեղեցիկ բարեփոխումները կմնան թղթի վրա»,- ասաց Հարությունյանը:
Նախարարը կարևորեց ժամանակակից գործիքների, հատկապես` էլեկտրոնային գործիքների կիրառումը կոռուպցիայի դեմ պայքարում, որոնք ներկայումս արդեն իսկ իրենց պտուղները տալիս են:
Հարությունյանի խոսքով` մեկ տարվա ընթացքում գրեթե երեք անգամ ավելացել են պետական ծառայություններ մատուցող մասնավոր գրասենյակները, իսկ սպառողների թիվը աճել է գրեթե 3-4 անգամ:
« Նշանակում է, պահանջարկը կա և այն գործիքը, որը ստեղծել ենք, աշխատում է: Մյուս քայլը իրավական ակտերի, նախագծերի հրապարկման միասնական կայքի ստեղծմանն է վերաբերում, որը հնարավորություն է տալիս հանրությանը մասնակից դարձնել Հայաստանի Հանրապետության կարևոր օրենսդրական փոփոխություններին: Այդ հարթակից օգտվողների թիվը նույնպես ամսեամիս աճում է»,- նշեց Հարությունյանը: