Հանրակրթական դպրոցներում մասնագիտական կողմնորոշման սենյակներ կստեղծվեն
ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում մասնագիտական կողմնորոշման այսօրվա պահանջը ոչ թե մասնագիտության ընտրությունն է, այլ նպատակի ճիշտ սահմանումը, կարիերայի ճիշտ պլանավորումը, մասնագիտությունից-զբաղմունք անցումն ու կարողությունների զարգացումը: «Արմենպրես»-ի հաղորդմամբ, լրագրողների հետ հանդիպմանը նման համոզմունք հայտնեց ՀՀ աշխատանքի և սոցիալական հարցերի նախարարության «Մասնագիտական կողմնորոշման մեթոդական կենտրոնի» ղեկավար Հայկուհի Գևորգյանը: Նա կարեւոր քայլ համարեց հանրակրթական ուսումնական հաստատություններում մասնագիտական կողմնորոշման ծառայությունների ներդրումը՝ նշելով, որ նախատեսվում է մի քանի դպրոցներում մասնագիտական կողմնորոշման սենյակներ ստեղծել: «Դա իրենից ենթադրում է, որ յուրաքանչյուր աշակերտ կունենա իր պորտֆոլիոն եւ, հետեւաբար, պատկերացում կկազմի աշխատաշուկայի այսօրվա իրավիճակի մասին: Հույս ունեմ, որ 2018 թվականին բոլոր դպրոցներում կլինեն նման դասասենյակներ»,-ասաց նա:
Հայկուհի Գեւորգյանի խոսքով` առաջին անգամ աշխատաշուկա մուտք գործող երիտասարդի մոտ գործատուն նախ եւ առաջ անձնային որակներն է կարեւորում, որ նա լինի պատասխանատու, պարտաճանաչ եւ կարողանա սովորել: «Այդ ամենից հետո նոր գործատուն հաշվի է առնում տվյալ երիտասարդի մասնագիտական կարողությունները»,-հավելեց Հայկուհի Գեւորգյանը:
ՀՀ աշխատանքի և սոցիալական հարցերի նախարարության զբաղվածության պետական գործակալության աշխատաշուկայի վերլուծության եւ նախատեսման բաժնի պետ Հասմիկ Թադեւոսյանն էլ մեծագույն սխալ համարեց մասնագիտություն ընտրելիս աշխատաշուկայում ընդունված եւ նորաձեւ մասնագիտությունները հաշվի առնելը: «Աշխատաշուկայում կան պարզապես ավելի քիչ եւ ավելի շատ պահանջված մասնագիտություններ: Մասնագիտություն ընտելիս պետք է անպայման հաշվի առնել աշխատաշուկայի պահանջները»,-հավելեց բանախոսը: