ՀՀ ոստիկանապետն այցելել է ոստիկանության զորքերի հրամանատարություն և 1032 զորամաս
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ոստիկանության պետ, ոստիկանության գեներալ-գնդապետ Վլադիմիր Գասպարյանը հոկտեմբերի 20-ին այցելել է ոստիկանության զորքերի հրամանատարություն և 1032 զորամաս: Այս մասին «Արմենպրես»-ը տեղեկացավ ՀՀ ոստիկանության պաշտոնական կայքից։
«Ոստիկանության պետը ստուգեց ծառայության պայմանները՝ հատուկ ուշադրություն դարձնելով զինծառայողների ֆիզիկական պատրաստության ապահովման խնդիրներին, որոնց լուծմանն են ծառայում հիմնանորոգված և կահավորված մարզադահլիճն ու մասնագիտացված մարզասրահները: Վլադիմիր Գասպարյանը ծանոթացավ մարզական հանդերձանքի, մարզագույքի ու սարքերի տեսականուն, մարզահրապարակում հետևեց պարապմունքների ընթացքին: Այս օրերին ոստիկանության զորքերի հրամանտարության ուշադրության կենտրոնում է նաև ստորաբաժանումների իրային ու մթերային նախապատրաստությունը ձմեռային պայմաններին: Ոստիկանության պետը զորամասի մթերապահոցում ստուգեց սննդամթերքի, պահածոների, կիսաֆաբրիկատների մթերման վիճակը, իսկ ճաշարանում՝ օրվա համար նախատեսված զինվորական ճաշատեսակները: Այցի ավարտին Վլադիմիր Գասպարյանը գոհունակություն հայտնեց զորամասի պատրաստականության կապակցությամբ և հանձնարարեց ավելի բարձրացնել ինչպես համազորային, այնպես էլ մասնագիտական պատրաստվածության մակարդակը»,- նշված է հաղորդագրության մեջ: