Հիմնադրամը գրեթե 3 մլն դոլար Է հավաքել Լաս Վեգասում հրաձգությունից տուժածների համար
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Լաս Վեգասում հրաձգության հետեւանքով տուժածների եւ զոհվածների ընտանիքների օգնության բարեգործական հիմնադրամը, որը կազմակերպվել Է տեղի իշխանությունների կողմից, արդեն ավելի քան 2,9 մլն դոլար Է հավաքել: Այդ մասին հոկտեմբերի 3-ին հայտնել Է Fox News ամերիկյան հեռուստաալիքը:
GoFundMe կայքում ընկերության՝ միջոցների հանգանակման Էջում զետեղված հայտարարության համաձայն, փողերը «կօգտագործվեն Լաս Վեգասում սարսափազդու հրաձգությունից տուժածներին եւ զոհվածների ընտանիքներին օգնություն ու ֆինանսական աջակցություն ցուցաբերելու համար»:
Հեռուստաալիքի հաղորդագրության մեջ նաեւ նշվում Է, որ հոկտեմբերի 2-ի առավոտից տեղի բնակիչները ժամերով հերթ են կանգնում, որպեսզի արյուն հանձնեն հրաձգությունից վիրավորված մարդկանց համար:
Ինչպես արդեն տեղեկացվել Է, ԱՄՆ-ի Լաս Վեգաս քաղաքում հրաձգությունից զոհվածների թիվը հասել Է 59-ի, վիրավորվել Է 527 մարդ: Հրաձգությունը տեղի Է ունեցել հոկտեմբերի 1-ի երեկոյան Լաս Վեգասում ընթացող երաժշտական փառատոնի ժամանակ: Կրակը բացել Է 64-ամյա Սթիվեն Պեդոկը, որն ինքասպան Է եղել: Այս ողբերգությունը խոշորագույնն Է ԱՄՆ-ում հրաձգության դեպքերի զոհերի թվաքանակով, հաղորդել Է «Ինտերֆաքս»-ը: