Փողային գործիքների փառատոնը Հայաստան կբերի օտարերկրացի երաժիշտների
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Ալեքսանդր Հարությունյանի անվան փողային գործիքների միջազգային փառատոնը Ա. Սպենդիարյանի անվան օպերայի և բալետի ազգային ակադեմիական թատրոնի աջակցման հիմնադրամի ջանքերով կանցկացվի հունիսի 25-30-ը Կամերային երաժշտության տանը:
«Արմենպրես»-ի հաղորդմամբ` փառատոնին մասնակցելու են երաժիշտներ Հայաստանից, Ռուսաստանից, Շվեյցարիայից, Գերմանիայից, Իտալիայից, Ֆրանսիայից, Սլովենիայից, Լեհաստանից, Պորտուգալիայից, Բելգիայից, Սերբիայից, Ճապոնիայից, Պուերտո Ռիկոյից:
Անդրանիկ փառատոնի շրջանակում կլինեն մի շարք պրեմիերաներ: Հաջորդ տարի փառատոնը կհյուրընկալի հանրահայտ շեփորահար Արթուրո Սանդովալին, ով կկատարի Ալեքսանդր Հարությունյանի «Շեփորի կոնցերտը»:
Փառատոնի գեղարվեստական ղեկավարը և դիրիժոր Կարեն Դուրգարյանն է: Այն իրականացվում է Հայաստանի պետական կամերային նվագախմբի և նվագախմբի գեղարվեստական ղեկավար ու գլխավոր դիրիժոր Վահան Մարտիրոսյանի հետ համատեղ: Փառատոնի իրականացմանն աջակցում են նաև ՀՀ մշակույթի նախարարությունը և Երևանի քաղաքապետարանը: