Ջրամբարների լրացվածության մակարդակի նվազումը գյուղացիները չեն զգա. Արսեն Հարությունյան
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Նախորդ տարվա համեմատ ջրամբարների լրացվածության մակարդակը մոտ 9 տոկոսով նվազել է:
«Արմենպրես»-ի հաղորդմամբ` այս մասին ապրիլի 27-ին լրագրողների հետ հանդիպման ժամանակ ասաց ՀՀ ջրային տնտեսության պետական կոմիտեի նախագահ Արսեն Հարությունյանը: Նրա խոսքով` այս տարի բավականին ձնառատ տարի է եղել և բոլորը սպասում էին, որ ջրամբարների լցվածությունը պետք է բարձր լիներ, բայց նախորդ տարիների համեմատ ձնհալքի համար չեն եղել անձրևներ, որոնք ձնհալքը կուղղորդեին դեպի ջրամբարներ:
«Փոխարենը եղել են արևոտ օրեր` գոլորշիացումը շատ է եղել, ինչի արդյունքում ջրամբարները քիչ են լցվել: Այս պահի դրությամբ մեր ջրամբարների լցվածության ծավալը մոտ 57 մլն խորանարդ մետր է: Մենք ամեն ինչ անելու ենք, որ ոռոգման ջրի սեզոնային շրջանում խնդիրներ չունենանք»,- ասաց նա` վստահեցնելով, որ գյուղացին չի զգալու ջրի պակասը: