Մանկապատանեկան գրքի շաբաթի շրջանակում աշակերտներն այցելեցին գրողների միություն

Armenpress 17:52, 30 Մարտ, 2017

ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: Արդեն 88 տարվա կյանք ունեցող «Ծիծեռնակ» ամսագիրը տպագրվում է փոքրիկների համար և նրանց մասնակցությամբ: Այստեղ ներկայացվում են նաև ժամանակակից մանկագիրների ստեղծագործությունները: Մանկապատանեկան գրքի շաբաթի շրջանակում մարտի 30-ին Հայաստանի գրողների միությունում Ծովակալ Իսակովի անվան թիվ 132 դպրոցի երրորդ դասարանի աշակերտները հանդիպեցին գրողների հետ և ծանոթացան «Ծիծեռնակ» ամսագրին:Հանդիպման սկզբում Հայաստանի գրողների միության նախագահ Էդվարդ Միլիտոնյանը ծանոթացրեց փոքրիկներին գրողների միության ստեղծման պատմությանը և գործունեությանը, հնչեցին պատմություններ հայ դասական և ժամանակակից գրողների մասին: Կարևորելով նմանատիպ ճանաչողական այցերը՝ միության նախագահ Էդվարդ Միլիտոնյանը նշեց. «Ուրախ եմ շատ, որ եկել եք այսօր:  Մեր ժողովրդի ամենամեծ հարստությունը հենց դուք եք: Մենք ձեզ համար ենք գրում: Ընդհանրապես մանուկները պետք է ճանաչեն իրենց համար լույս տեսնող թերթերն ու ամսագրերը, քանի որ դասագրքերում քիչ թվով նյութեր են զետեղված»:Էդվարդ Միլիտոնյանի կարծիքը կիսեց նաև Հայաստանի գրողների միության վարչության քարտուղար Պետրոս Դեմիրճյանը, ով իր խոսքում ասաց, որ կարևորում է նմանատիպ նախաձեռնությունները և շատ ուրախացավ, երբ դպրոցն ինքը հանդես եկավ նման առաջարկով:«Մենք ուզեցինք երեխաներն իրենք անձամբ տեսնեն և շփվեն այն գրողների հետ, որոնց ստեղծագործությունները կարդում են: Կարծում եմ այս հանդիպումից հետո երեխաներն ընթերցանությանը շատ ավելի մեծ ուշադրություն կդարձնեն»,- «Արմենպրես»-ի հաղորդմամբ՝ մեկնաբանեց դասղեկ Արմինե Գևորգյանը:Վերջում երեխաները գրողների միության շենքում կատարեցին փոքրիկ էքսկուրս, որի ժամանակ ծանոթացան տեղի հրատարակչությանը, տպարանին՝ հասկանալու, թե ինչպես են ստեղծվում գրքերը:Նոռա Գրիգորյան



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am