Վարչապետ հանձնարարեց մանրամասներ ներկայացնել «Ալյանս» ԱՏԳ-ի գործունեությունն ու առավելությունները
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: ՀՀ կառավարությունը հաստատեց «ԻՆՍՏԻԳԵՅԹ ՌՈԲՈՏԻՔՍ» ՓԲԸ-ին տրված «Ալյանս» ազատ տնտեսական գոտու շահագործողի թույլտվությունը դադարեցնելու մասին որոշման նախագիծը: ՀՀ տնտեսական զարգացման և ներդրումների նախարար Սուրեն Կարայանը նշեց, որ լրանում է «ԻՆՍՏԻԳԵՅԹ ՌՈԲՈՏԻՔՍ»-ի` «Ալյանս» ազատ տնտեսական գոտու շահագործողի գործունեություն իրականացնելու թույլտվության ժամկետը և ընկերությունը չի ներկայացրել նոր հայտ՝ շահագործողի թույլտվությունը երկարաձգելու վերաբերյալ:
ՀՀ վարչապետ Կարեն Կարապետյանը հանձնարարեց տեղեկանք ներկայացնել և նախարարն ինքն էլ վերլուծի, թե ինչ առավելություններ է տալիս ազատ տնտեսական գոտին: «Իմանանք, թե ով է գնացել ազատ տնտեսական գոտի, և դրանից ինչ է առաջացել, իրականում առավելություն տալի՞ս է, թե ոչ, պետք է՝ դա հասկանալ»,- «Արմենպրես»-ի հաղորդմամբ, ասաց վարչապետը: