ԶԼՄ-ներն իմացել են Ռաքքայի վրա քրդերի և արաբ աշխարհազորայինների հարձակման նախապատրաստման մասին
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: «Իսլամական պետության» մայրաքաղաք համարվող սիրիական Ռաքքայի վրա ծավալուն հարձակումը նախատեսվում է սկսել 2017թ. ապրիլին, հայտնել են ԱՄՆ-ի աջակցությամբ գործող Սիրիայի Դեմոկրատական ուժերի ներկայացուցիչները։ Այս մասին «Արմենպրես»-ը տեղեկացնում է՝ վկայակոչելով «Ինտերֆաքս»-ը։
ԶԼՄ-ները մարտի 26-ին հայտնել են, որ քուրդ և արաբ աշխարհազորայիններին հաջողվել է ԻՊ-ի գրոհայիններից գրեթե ամբողջությամբ հետ գրավել Ռաքքայի մատույցների Ալ Քարմա քաղաքը, ինչը դիտարկվում է որպես Ռաքքայի վրա հարձակման նախապատրաստում։
Ներկայում Ռաքքայի շուրջ օղակը սեղմվում է, աշխարհազորայիններն աստիճանաբար քաղաքին մոտենում են տարբեր ճակատներում, նշում են ԶԼՄ-ները՝ հղում անելով տարբեր աղբյուրներ։