Սերժ Սարգսյանը պարգեւատրեց «Լույս» հիմնադրամի «Ստարտ Արմենիա» ձեռներեցության դրամաշնորհի հաղթողներին
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը պարգեւատրեց «Լույս» հիմնադրամի «Ստարտ Արմենիա» ձեռներեցության դրամաշնորհի հաղթողներին:
Մրցույթի հաղթողներն այս տարի երկուսն են` Նարեկ Ասլիկյանը եւ Գրիգորի Ենիկոլոպովը: Նարեկ Ասլիկյանի նախագիծը երիտասարդ մասնագետների համար ՏՏ եւ ծրագրավորման գործնական ուսուցման կենտրոնի հիմնումն է, իսկ Գրիգորի Ենիկոլոպովը եւս 4 նախաձեռնողների հետ նախատեսում է Լոռիում «Գիտության թանգարան» հիմնել, որը կխթանի մարզի տնտեսական ու զբոսաշրջային զարգացմանը` ստեղծելով նոր ու նորարարական ենթակառուցվածքներ:
Շնորհավորելով հաղթողներին՝ ՀՀ Նախագահ Սերժ Սարգսյանը վստահություն հայտնեց, որ ժյուրին կարողացել է ընտրել լավագույններին: «Լավ հաղթանակը այն հաղթանակն է, որը ձեռք է բերվել նվազագույն կորուստներով: Միեւնույն ժամանակ, ցանկանում եմ, որ բոլորս միասին հաստատենք՝ մրցույթին ներկայացված բոլոր աշխատանքները պետք է ծառայեն Հայաստանի զարգացմանը»,-«Արմենպրես»-ի փոխանցմամբ՝ ասաց Սերժ Սարգսյանը:
«Լույսի» «Ստարտ Արմենիա» ձեռներեցության դրամաշնորհը խթանում է գործարար հնարամիտ գաղափարները եւ ձեռներեցության նորարարական մշակույթ սերմանում հայրենիքում:
«Ստարտ Արմենիա» մրցույթին կարող են մասնակցել միայն «Լույսի» այն ուսանողները եւ շրջանավարտները, ովքեր ծրագրում են գործարար կամ սոցիալական ձեռնարկ իրականացնել Հայաստանում: