ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ:  «Թումո Գյումրի»-ի 17-ամյա ուսանող Մարտին Մանուկյանի լուսանկարը ընդգրկվել է Իտալիայում անցկացվող միջազգային Arte Laguna ժամանակակից արվեստի հանրահայտ մրցույթի լուսանկարչության բաժնի եզրափակչի մասնակիցների ցանկում։ Այս մասին «Արմենպրես»-ին տեղեկացրին ստեղծարար տեղնոլոգիաների «Թումո» կենտրոնից՝ հավելելով. «Գյումրիի շինությունների հակադրությունը ներկայացնող լուսանկարը ստեղծվել է գերմանացի տեսողական արտիստ Կատարինա Ռոթերսի` «Թումո»-ում անցկացրած աշխատարանի շրջանակներում։ «UrbanLab Երևան»-ի հետ համագործակցությամբ իրականացված լուսանկարչական աշխատարանի ընթացքում «Թումո Գյումրի»-ի մի խումբ ուսանողներ հետազոտեցին Գյումրիի ճարտարապետությունը լուսանկարչական տեսանկյունից։ Ստացված ֆոտոշարքը ընդգրկվեց Վենետիկի ճարտարապետական բիենալեում Հայաստանը ներկայացնող UrbanLab-ի ինստալյացիայի մեջ։

Այժմ, շարքի մասը հանդիսացող լուսանկարը մրցելու է ժամանակակից արվեստի մրցույթի եզրափակիչ հասած աշխարհի տարբեր երկրներից ուղարկված աշխատանքների հետ, և մասնակցելու է Arte Laguna-ի մեծ ցուցադրությանը Վենետիկի հանրահայտ «Արսենալ« ցուցասրահում՝ մարտի 25-ից ապրիլի 9-ը։ Մրցույթի հաղթողները կհայտարարվեն մարտի 25-ին։ Մարտինը լուսանկարչությամբ սկսել է հետաքրքրվել «Թումո»-ում, որտեղ և անցել է իր առաջին դասընթացները այդ ոլորտում։  «Սիրում եմ նկարել ինչ-որ թեմայի շուրջ, այսինքն՝ նկարներովս ինչ-որ բան պատմել մարդկանց։ Բայց ինձ թվում է, որ լուսանկարների ցանկացած թեմայից զատ՝ առաջին հերթին ֆոտո եմ անում, որ ցույց տամ, թե ով եմ ես», - ասում է պատանին։