Արդեն նախապատրաստվում ենք Եվրոպայի առաջնությանը. Լևոն Ջուլֆալակյան
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ: Հայաստանի հունահռոմեական ոճի ըմբշամարտի հավաքականն արդեն իսկ սկսել է նախապատրաստվել Եվրոպայի առաջնությանը:
«Արմենպրես»-ի հետ զրույցում Հայաստանի հավաքականի մարզիչ Լևոն Ջուլֆալակյանը փաստեց, որ երևանյան մարզումը ևս նախապատրաստական է: «Մեր հիմնական նպատակը Եվրոպայի առաջնությունն է՝ անկախ նրանից, որ մինչ այդ ունենք միջազգային մրցաշարեր: Հավաքների և միջազգային մրցաշարերի միջոցով ուզում ենք լավ նախապատրաստվել Եվրոպայի առաջնությանը»,- ասաց հավաքականի մարզիչը:
Ըմբշամարտի Հայաստանի հավաքականը Նորայր Մուշեղյանի անվան օլիմպիական մանկապատանեկան մարզադպրոցում սկսում է ուսումնամարզական հավաքը: Երևանյան ուսումնամարզական հավաքին մասնակցում են 24 մարզիկ` բոլոր մեծահասակների հավաքականներից:
Այս տարվա Եվրոպայի առաջնությունը կկայանա մայիսի 2-7-ը Սերբիայի Նովի Սադ քաղաքում: