ՀՀ ՏԶՆ և Արցախի էկոնոմիկայի նախարարները քննարկել են զբոսաշրջության և ներդրումների ոլորտներում համագործակցությունը
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ տնտեսական զարգացման և ներդրումների նախարար Սուրեն Կարայանը դեկտեմբերի 8-ին ընդունել է Արցախի Հանրապետության էկոնոմիկայի նախարար Անդրանիկ Խաչատրյանի գլխավորած պատվիրակությանը:
Ինչպես «Արմենպրես»ին տեղեկացրին ՀՀ տնտեսական զարգացման և ներդրումների նախարարության տեղեկատվության և հասարակայնության հետ կապերի բաժնից, նախարար Սուրեն Կարայանն իր ներածական խոսքում նշել է, որ այս հանդիպումը ավելի վաղ Ստեփանակերտում հիմք դրված համաձայնության` ավելի ինստիտուցիոնալ համագործակցության առաջին քայլն է:
Արցախի էկոնոմիկայի նախարար Անդրանիկ Խաչատրյանը բարձրաձայնել է բոլոր խնդիրները, որոնք ծառացած են արցախցի գործարարների առջև: «Շատ տեղին էր այսօրվա հանդիպումը այս ձևաչափով: Համոզված եմ, որ կարողանալու ենք կուտակված խնդիրներին լուծումներ տալ»,- ասել է նախարար Խաչատրյանը:
Կողմերը քննարկել են զբոսաշրջության ոլորտին առնչվող մի շարք հարցեր, որոնց թվում է դեպի Արցախ զբոսաշրջության խթանումը: Համաձայնություն է ձեռք բերվել համատեղել ջանքերը օտարերկրյա զբոսաշրջիկների համար Հայաստան-Արցախ երթուղիների մշակման գործում, այս համատեքստում կազմակերպել հանդիպումներ տուրօպերատորների համար: Հանդիպման մասնակիցները պայմանավորվել են նաև քայլեր ձեռնարկել դեպի Արցախ ներգնա զբոսաշրջությունը զարգացնելու համար:
Սուրեն Կարայանն առաջարկել է նաև համագործակցել համատեղ ներդրումային ծրագրերի իրականացման շրջանակներում` օտարերկրյա ներդրողներին ներկայացնելով Արցախի ներդրումային գրավչությունը: