Հայաստանը ունի շատ ազատ թվային տարածք. Սվիտալսկի
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանում խոսքի ազատությունը բավականին լավ վիճակում է: «Արմենպրես»-ի հաղորդմամբ՝ այս մասին խոսքի և մամուլի ազատությանը նվիրված աշխատաժողովում ասաց Հայաստանում ԵՄ պատվիրակության ղեկավար Պյոտր Սվիտալսկին:
«Հեղինակավոր կազմակերպություների կողմից կազմված վարկանիշներում Հայաստանը ամենաբարձրն է Եվրասիական տնտեսական միության երկրների համեմատ: Արդյոք սա նշանակո՞ւմ է, որ Հայաստանը պետք է բավարարված լինի ձեռքբերվածով, իհարկե` ոչ, քանզի կան որոշակի բացեր, որոնք պետք է լրացվեն»,-նշեց Սվիտալսկին:
Նա ասաց, որ շատ է հավանում թվային ԶԼՄ-ների աշխատանքը Հայաստանում: «Շատ եմ հավանում, թե ինչքան ազատ են աշխատում թվային ԶԼՄ-ները: Ֆեյսբուքյում մարդիկ ազատ մեկնաբանում են, քննադատում և′ իշխանությանը, և′ ընդդիմությանը: Ես շատ եմ հավանում այն փաստը, որ մարդիկ չեն վախենում մեկնաբանություններ թողնել, որոնք քննադատական են: Հայաստանը ունի շատ ազատ թվային տարածք»,- ընդգծեց Սվիտալսկին: