Ոստիկանությունն արգելել է Դիարբեքիրի քաղաքապետարանի դիմաց կազմակերպվող ցույցը
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքական ոստիկանությունը միջամտել է քրդամետ Ժողովուրդների դեմոկրատական կուսակցության կոչով Դիարբեքիրի քաղաքապետարանի մոտ իրականացվող բողոքի ցույցին: Ինչպես հաղորդում է «Արմենպրես»-ը, այս մասին տեղեկացնում է «Ակոս» պարբերականը:
Դիարբեքիրի նահանգապետարանը տեղի ժամանակով 11.00-ից սկսված բողոքի ցույցն անօրինական է համարել և հորդորել է քաղաքացիներին ենթարկվել իրենց կարգադրություններին:
Թուրքիայի քրդամետ Ժողովուրդների դեմոկրատական կուսակցությունը Դիարբեքիրի քաղաքապետեր Գյուլթան Քըշանաքի և Ֆըրաթ Անլըի ձերբակալության առնչությամբ հայտարարել է բողոքի ակցիաներ սկսելու մասին: Քաղաքական ուժը հայտնել է, որ բողոքի ակցիաները շարունակվելու են առանց դադարների: