Ուկրաինացի պատմաբանը պարգևատրվել է «Հայոց ցեղասպանության զոհ գնացած Սուրբ նահատակների» շքանշանով
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Հոլոքոստի ուսումնասիրության «Տկումա» ուկրաինական ինստիտուտի տնօրեն Իգոր Շուպակը հոկտեմբերի 17-ին պարգևատրվել է «Հայոց ցեղասպանության զոհ գնացած Սուրբ նահատակների» շքանշանով: Ինչպես տեղեկացնում է «Արմենպրես»-ը, այս մասին հայտնում է Analitika.ua կայքը:
Ուկրաինայում հայերի միության պատմամշակութային կոմիտեի նախագահ Դավիթ Դավթյանը հանդիսավորությամբ հանձնել է պարգևը Իգոր Շուպակին:
«Հրեա ժողովուրդն ու Հոլոքստը» թանգարանում առաջին անգամ Հայոց ցեղասպանությանը նվիրված մշտական ցուցադրությունը նախաձեռնվել էր Իգոր Շուպակի կողմից: Ծրագիրն իրականացվել է Հոլոքոստի ուսումնասիրությունների ուկրաինական ինստիտուտի՝ «Տկումա»-ի և Ուկրաինայի հայերի միության պատմամշակութային կոմիտեի համագործակցությամբ :
«Հայոց ցեղասպանության զոհ գնացած Սուրբ նահատակների»պարգևը հաստատվել է Ոկրաինայում հայերի միության կողմից Հայոց ցեղասպանության 100-րդ տարելիցից ընդառաջ: