ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Գերմանական Deutsche Welle լրատվամիջոցը դատական հայց է ներկայացրել Թուրքիայի երիտասարդության և սպորտի նախարարության դեմ: Ինչպես հաղորդում է «Արմենպրես»-ը, այս մասին տեղեկացնում է Deutsche Welle-ն:

Լրատվամիջոցի կողմից հեռարձակվող Conflict Zone հաղորդման մոդերատոր Միշել Ֆրիդմանը 2016 թվականի սեպտեմբերի 5-ին հարցազրույց է արել Թուրքիայի երիտասարդության և սպորտի նախարար Աքիֆ Չաղաթայի հետ: Հարցազրույցից անմիջապես հետո նախարարի կարգադրությամբ նկարահանված նյութերն առգրավվել են և չեն թույլատրել հրապարակել:

Նախարարությունը չի կատարել նյութերը հետ վերադարձնելու պահանջը, ինչից հետո լրատվամիջոցը դատական հայց է ներկայացրել Անկարայի դատարան:

Նախարարի հետ հարցազրույցի ընթացքում DW-ի լրագրողը քննարկել է հուլիսի 15-ի հեղաշրջման փորձը, դրան հետևած զանգվածային ձերբակալությունները, Թուրքիայում խոսքի ազատության վիճակը և թուրքական հասարակությունում կանանց դերը: