ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Վրաստանի կառավարության ղեկավարը հանդիպում է անցկացրել ամերիկացի կոնգրեսականներ Դունկան Հանթերի եւ Մարկ Սենֆորդի հետ, որոնք Վրաստանում են գտնվում աշխատանքային այցով, տեղեկացնում է «Արմենպրես»-ը՝ հղում անելով «Գրուզիա Online»-ին:

Կվիրիկաշվիլին շնորհակալություն է հայտնել ամերիկացի սենատորներին Ցխինվալի գոտի այցելելու եւ Վրաստանի տարածքային ամբողջականությանն աջակցելու համար:

Բացի այդ, վարչապետը կոնգրեսականներին ծանոթացրել է Վրաստանի խորհրդարանի ընտրությունների նախապատրաստմանը եւ երկրում իրականացվող բարեփոխումներին:

«Պատվիրակությունը շատ արդյունավետ հանդիպում անցկացրեց Վրաստանի վարչապետի հետ: Մենք քննարկեցինք վրացիների եւ ամերիկացիների համար կարեւոր նշանակություն ունեցող հարցեր, ներառյալ տարածաշրջանային անվտանգության թեման»,- վարչապետի հետ հանդիպումից հետո լրագրողներին ասել Է Հանթերը: