ԵԱՏՄ պայմանագիրը Չինաստանի հետ չի փոխարինի անդամ երկրներ-ՉԺՀ հարաբերություններին. Տիգրան Սարգսյան
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Եվրասիական տնտեսական հանձնաժողովի կոլեգիայի նախագահ Տիգրան Սարգսյանը ՏԱՍՍ-ին տված հարցազրույցում պատմել է առեւտրատնտեսական համագործակցության շուրջ Չինաստանի հետ բանակցային գործընթացի, ինչպես նաեւ ԵԱՏՄ-ի անդամ երկրների հետագա ինտեգրացման հեռանկարների մասին, տեղեկացնում է «Արմենպրես»-ը:
Նա հիշեցրել է, որ 2015 թվականի մայիսին Եվրասիական բարձրագույն տնտեսական խորհուրդը որոշում է ընդունել ՉԺՀ-ի հետ բանակցություններ սկսել առեւտրատնտեսական համագործակցության (ԱՏՀ) համաձայնագրի կնքման շուրջ: Սարգսյանը նշել է, որ չինական կողմը, ինչպես նաեւ ԵԱՏՄ-ի անդամ պետությունները ԱՏՀ-ի մասին ապագա համաձայնագիրը դիտում են որպես կազմակերպության եւ Մետաքսի ճանապարհի տնտեսական գոտու (ՄՃՏԳ) չինական նախաձեռնության զուգակցման գործընթացի բաղադրիչ մասը:
«ՄՃՏԳ-ն ինքը գլոբալ նախագիծ է, որը ներառում է ամենատարբեր բաղադրիչներ՝ տնտեսությունը, առեւտուրը, տրանսպորտը, մշակույթը, կրթությունը եւ այլն: Եվ հարկավոր է նշել, որ իր բազմավեկտորայնության պատճառով ՄՃՏԳ-ի նախագծերի իրացումը վերապահված չէ ՉԺՀ-ի որեւէ նախարարության կամ մի կազմակերպության: Հանձնաժողովը ԱՏՀ-ի մասին համաձայնագրի կնքման ուղղությամբ աշխատում է ՉԺՀ-ի առեւտրի նախարարության հետ, թեեւ ՄՃՏԳ-ի համար պատասխանատու է ոչ միայն այդ նախարարությունը, այլեւ Զարգացման եւ բարեփոխումների պետական կոմիտեն, ԱԳ նախարարությունը, Մետաքսի ճանապարհի հիմնադրամը եւ այլ հիմնարկություններ»,-ասել է ԵԱՏՀ-ի կոլեգիայի նախագահը, հավելելով, որ Պեկին իր այցի հիմնական նպատակը հանդիպումն էր Չինաստանի Պետխորհրդի փոխվարչապետ Չժան Գաոլիի հետ, որը ղեկավարում Է ՄՃՏԳ-ի գծով գործնականում բոլոր պետական հիմնարկությունների ու կառույցների աշխատանքը:
Խոսելով բանակցություններին հատկացված ժամկետների մասին՝ Սարգսյանը նշել է, թե կողմերը ելնում են այն բանից, որ որքան ավելի շուտ կնքվի համաձայնագիրը, այնքան ավելի շահեկան կլինի դրա մասնակիցների համար, բայց չպետք է ավելորդ շտապողականություն դրսեւորվի ի վնաս համաձայնագրի եւ կողմերի շահերի:
Նա ընդգծել է, որ ԱՏՀ-ի մասին համաձայնագիրը չի փոխարինի ՉԺՀ-ի հետ ԵԱՏՄ-ի անդամ առանձին պետությունների հարաբերություններին: «Ընդհակառակը, առեւտրատնտեսական համագործակցության մասին համաձայնագիրը կնաստի ՉԺՀ-ի հետ ԵԱՏՄ-ի անդամ բոլոր պետությունների հարաբերությունների ինտիտուալացմանը»,- ասել է Սարգսյանը: